jab se us ne shahar ko chhoda har rasta sunsaan hua
apna kya hai saare shahar ka ik jaisa nuqusaan hua
ye ye aaseb ki nagri maskan sochoon wahmon ka
soch raha hoon is nagri mein tu kab se mehmaan hua
sahra ki munh-zor hawaaein auron se mansoob huin
muft mein ham aawaara thahre muft mein ghar weeraan hua
mere haal pe hairat kaisi ke tanha mausam mein
patthar bhi ro padte hain insaan toh phir insaan hua
itni der mein ujde dil par kitne mahshar beet gae
jitni der mein tujh ko pa kar khone ka imkaan hua
kal tak jis ke gird tha raqsan ik amboh sitaaron ka
aaj usi ko tanha pa kar main toh bahut hairaan hua
us ke zakhm chhupa kar rakhiye khud us shakhs ki nazron se
us se kaisa shikwa keeje wo toh abhi naadaan hua
jin ashkon ki pheeki lau ko ham be-kaar samajhte the
un ashkon se kitna raushan ik taareek makaan hua
yoon bhi kam-aamez tha mohsin wo is shahar ke logon mein
lekin mere saamne aa kar aur bhi kuchh anjaan hua
Responses
No comments yet. Be the first to respond.