jab ke shahar mein dhoop utri main jaag pada toh khawaab hua
miri soch khizan ki shaakh bani tira chehra aur gulaab hua
barfeeli rut ki tez hawa kyoon jheel mein kankar phenk gai
ik aankh ki neend haraam hui ik ka aks kharaab hua
tire hijr mein zehan pighalta tha tire qurb mein aankhein jalti hain
tujhe khona ek quayaamat tha tira milna aur azaab hua
bhare shahar mein ek hi chehra tha jise aaj bhi galiyan dhoondati hain
kisi subh usi ki dhoop khili kisi raat wahi mahtaab hua
badi umr ke baad in aankhon mein koi abr utra tiri yaadon ka
mire dil ki zamin aabaad hui mire gham ka nagar shaadaab hua
kabhi wasl mein mohsin dil toota kabhi hijr ki rut ne laaj rakhi
kisi jism mein aankhein kho baithe koi chehra khuli kitaab hua
Responses
No comments yet. Be the first to respond.