ghazlon ki dhanak odh mire shola-badan tu
hai mera tu mira mauzoo-e-sukhan tu
kaliyon ki tarah phoot sar-e-shaakh-e-tamannaa
khushboo ki tarah phail -ta-b-chaman tu
naazil ho kabhi zehan pe aayaat ki soorat
aayaat mein dhal ja kabhi jibreel dahan tu
ab kyoon na sajaaoon main tujhe deeda o dil mein
lagta hai andhere mein sawere ki kiran tu
pahle na koi ramz-e-sukhan thi na kinaaya
ab nuqta-e-takmeel-e-hunar mehwar-e-fan tu
ye kam toh nahi tu mira meyaar-e-nazar hai
ai dost mire waaste kuchh aur na ban tu
mumkin ho toh rahne de mujhe zulmat-e-jan mein
dhoondega kahan chaandani raaton ka kafan tu
Responses
No comments yet. Be the first to respond.