wo reza reza mire badan mein utar raha hai

main quatra quatra usi ki aankhon ko pi raha hoon

tiri hatheli pe kis ne likkha hai quatl mera

mujhe toh lagta hai main tira dost bhi raha hoon

khuli hain aankhein magar badan hai tamaam patthar

koi bataae main mar chuka hoon ki ji raha hoon

kahan milegi misaal meri sitmagri ki

ki main gulaabon ke zakhm kaanton se si raha hoon

na poochh mujh se ki shahar waalon ka haal kya tha

ki main toh khud apne ghar mein bhi do ghadi raha hoon

mila toh beete dinon ka sach us ki aankh mein tha

wo aashna jis se muddaton ajanbi raha hoon

bhula de mujh ko ki bewfaai baja hai lekin

ganwa na mujh ko ki main tiri zindagi raha hoon

wo ajanbi ban ke ab mile bhi toh kya hai mohsin

ye naaz kam hai ki main bhi us ka kabhi raha hoon