ab ye sochoon toh bhanwar zehan mein pad jaate hain
kaise chehre hain jo milte hi bichhad jaate hain
kyoon tire ko dein tohmat-e-weeraani-e-dil
zalazlon mein toh bhare shahar ujad jaate hain
mausam-e-zard mein ik ko bachaaoon kaise
aisi rut mein toh ghane ped bhi jhad jaate hain
ab koi kya mire quadmon ke nishan dhoondega
tez aandhi mein toh kheme bhi ukhad jaate hain
shaghl-e-arbaab-e-hunar poochhte kya ho ki ye log
pattharon mein bhi kabhi aaine jad jaati hain
soch ka aaina dhundala ho toh phir waqt ke saath
chaand chehron ke khad-o-khaal bigad jaate hain
shiddat-e-gham mein bhi zinda hoon toh hairat kaisi
kuchh diye tund hawaaon se bhi lad jaate hain
wo bhi kya log hain mohsin jo wafa ki khaatir
khud-taraasheeda usoolon pe bhi ad jaate hain
Responses
No comments yet. Be the first to respond.