kis ke bas mein tha hawa ki wahashton ko rokna

barg-e-gul ko khaak shole ko dhuan hona hi tha

jab koi samt-e-safar tay thi na hadd-e-rahguzar

ai mire rah-rau safar toh raaegan hona hi tha

mujh ko rukna tha use jaana tha agle mod tak

faisla ye us ke mere darmiyan hona hi tha

chaand ko chalna tha bahti seepiyon ke saath saath

mojiza ye bhi tah-e-aab-e-rawan hona hi tha

main nae chehron pe kahta tha nai ghazlein sada

meri is aadat se us ko bad-guman hona hi tha

shahar se baahar ki weeraani basaana thi mujhe

apni tanhaai pe kuchh toh meharban hona hi tha

apni aankhein dafn karna thin ghubaar-e-khaak mein

ye sitam bhi ham pe zer-e-aasman hona hi tha

be-sada basti ki rasmein thin yahi mohsin mire

main zaban rakhta tha mujh ko be-zaban hona hi tha