yaad thin ham ko bhi ranga-rang bazm-aaraaeeyan

lekin ab naqsh-o-nigaar-e-taaque-e-nisyan ho gain

thin banaat-un-naash-e-gardun din ko parde mein nihan

shab ko un ke ji mein kya aai ki uryan ho gain

quaid mein yaaquoob ne li go na yoosuf ki khabar

lekin aankhein rauzan-e-deewar-e-zindan ho gain

sab raqueebon se hon naa-khush par zanaan-e-misr se

hai zulekha khush ki mahaw-e-maah-e-kanaan ho gain

joo-e-khoon aankhon se bahne do ki hai shaam-e-firaaque

main ye samjhoonga ki shamaein do farozan ho gain

in pari-zaadon se lenge khuld mein ham intiquam

qudrat-e-haque se yahi hoorein agar wan ho gain

neend us ki hai dimaagh us ka hai raatein us ki hain

teri zulfein jis ke baazoo par pareshan ho gain

main chaman mein kya gaya goya dabistan khul gaya

bulbulein sun kar mire naale ghazal-khwan ho gain

wo nigaahein kyoon hui jaati hain yaa-rab dil ke paar

jo miri kotaahi-e-quismat se mizgan ho gain

bas-ki roka main ne aur seene mein ubhrin pai-b-pai

meri aahein bakhiya-e-chaak-e-gareban ho gain

wan gaya bhi main toh un ki gaaliyon ka kya jawaab

yaad thin jitni duaaein sarf-e-darban ho gain

jan-fiza hai baada jis ke haath mein jaam aa gaya

sab lakeerein haath ki goya rag-e-jan ho gain

ham muwahhid hain hamaara kesh hai tark-e-roosoom

millatein jab mit gain ajza-e-iman ho gain

ranj se khoogar hua insan toh mit jaata hai ranj

mushkilein mujh par padin itni ki aasan ho gain

yoon hi gar rota raha ghaalib toh ai ahal-e-jahan

dekhna in bastiyon ko tum ki weeran ho gain