poochh mat wajh-e-siyah-masti-e-arbaab-e-chaman

saaya-e-taak mein hoti hai hawa mauj-e-sharaab

jo hua gharqua-e-mai bakht-e-rasa rakhta hai

sar se guzre pe bhi hai baal-e-huma mauj-e-sharaab

hai ye barsaat wo mausam ki ajab kya hai agar

mauj-e-hasti ko kare faiz-e-hawa mauj-e-sharaab

chaar mauj uthti hai toofaan-e-tarab se har soo

mauj-e-gul mauj-e-shafaque mauj-e-saba mauj-e-sharaab

jis quadar rooh-e-nabaati hai jigar tishna-e-naaz

de hai taskin b-dam-e-aab-e-baqua mauj-e-sharaab

bas-ki daude hai rag-e-taak mein khoon ho ho kar

shahpar-e-rang se hai baal-kusha mauj-e-sharaab

mauja-e-gul se charaaghan hai guzar-gaah-e-khayaal

hai tasawwur mein zi-bas jalwa-numa mauj-e-sharaab

nashshe ke parde mein hai mahaw-e-tamaasha-e-dimaagh

bas-ki rakhti hai sar-e-nash-o-numa mauj-e-sharaab

ek aalam pe hain toofaani-e-kaifiyat-e-fasl

mauja-e-sabza-e-nau-khez se ta mauj-e-sharaab

sharah-e-hangaama-e-hasti hai zahe mausam-e-gul

rah-bar-e-quatra-ba-dariya hai khosha mauj-e-sharaab

hosh udte hain mire jalwa-e-gul dekh asad

phir hua waqt ki ho baal-kusha mauj-e-sharaab