na ho husn-e-tamaasha-dost ruswa bewfaai ka

b-mohar-e-sad-nazar saabit hai daawa paarsaai ka

zakat-e-husn de ai jalwa-e-beenish ki mehar-aasa

charaagh-e-khana-e-darwesh ho kaasa gadaai ka

na maara jaan kar be-jurm ghaafil teri gardan par

raha maanind-e-khoon-e-be-gunah haque aashnaai ka

tamannaa-e-zabaan mahaw-e-sipaas-e-be-zabaani hai

mita jis se taquaza shikwa-e-be-dast-o-paai ka

wahi ik baat hai jo yan nafas wan nikhat-e-gul hai

chaman ka jalwa baais hai miri rangin-nawaai ka

dahaan-e-har-but-e-paighaara-joo zanjeer-e-ruswaai

adam tak bewfa charcha hai teri bewfaai ka

na de naale ko itna tool ghaalib mukhtasar likh de

ki hasrat-sanj hoon arz-e-sitam-ha-e-judaai ka

jahan mit jaae sai-e-deed khizraaabaad-e-aasaaish

b-jeb-e-har-nigah pinhan hai haasil rahnumaai ka

b-ijz-aabaad waham-e-muddaa tasleem-e-shokhi hai

taghaaful ko na kar masroof-e-tamkin-aazmaai ka

asad ka quissa toolaani hai lekin mukhtasar ye hai

ki hasrat-kash raha arz-e-sitam-ha-e-judaai ka

hawas gustaakhi-e-aaeena takleef-e-nazar-baazi

b-jeb-e-aarzoo pinhan hai haasil dilrubaai ka

nazar-baazi tilism-e-wahshat-aabaad-e-paristan hai

raha begaana-e-taaseer afsoon aashnaai ka

na paaya dardamand-e-doori-e-yaaraan-e-yak-dil ne

sawaad-e-khatt-e-peshaani se nuskha momyaai ka

asad ye ijz-o-be-saamaani-e-firaaun-e-tauam hai

jise tu bandagi kahta hai daawa hai khudaai ka