hui hai maane-e-zauque-e-tamaasha khana-weeraani

kaf-e-sailaab baaqui hai b-rang-e-pumba rauzan mein

wadeeat-khana-e-bedaad-e-kaawish-ha-e-mizgan hoon

nageen-e-naam-e-shaahid hai mire har quatra-e-khoon tan mein

bayan kis se ho zulmat-gustari mere shabistan ki

shab-e-mah ho jo rakh doon pumba deewaaron ke rauzan mein

nikohish maana-e-be-rabti-e-shor-e-junoon aai

hua hai khanda-e-ahbaab bakhiya jeb-o-daaman mein

hue us mehar-wash ke jalwa-e-timsaal ke aage

par-afshan jauhar aaeene mein misl-e-zarra rauzan mein

na jaanoon nek hoon yaa bad hoon par sohbat-mukhaalif hai

jo gul hoon toh hoon gulkhan mein jo khas hoon toh hoon gulshan mein

hazaaron dil diye josh-e-junoon-e-ishq ne mujh ko

siyah ho kar suwaida ho gaya har quatra-e-khoon tan mein

asad zindaani-e-taaseer-e-ulfat-ha-e-khooban hoon

kham-e-dast-e-nawaazish ho gaya hai tauque gardan mein

fuzoon ki doston ne hirs-e-quatil zauque-e-kushtan mein

hoe hain bakhiya-ha-e-zakhm jauhar tegh-e-dushman mein

tamaasha karadni hai lutf-e-zakhm-e-intizaar ai dil

suwaida daagh-e-marham mardumuk hai chashm-e-sozan mein

dil-o-deen-o-khirad taaraaj-e-naaz-e-jalwa-pairaai

hua hai jauhar-e-aaeena khel-e-mor khirman mein

nikohish maane-e-deewaangi-ha-e-junoon aai

lagaaya khanda-e-naaseh ne bakhiya jeb-o-daaman mein