karta hoon jama phir jigar-e-lakht-lakht ko

arsa hua hai daawat-e-mizgan kiye hue

phir waz-e-ehtiyaat se rukne laga hai dam

barson hue hain chaak gareban kiye hue

phir garm-naala-ha-e-sharar-baar hai nafas

muddat hui hai sair-e-charaaghan kiye hue

phir pursish-e-jaraahat-e-dil ko chala hai ishq

saamaan-e-sad-hazaar namak-dan kiye hue

phir bhar raha hoon khaama-e-mizgan b-khoon-e-dil

saaz-e-chaman taraazi-e-daaman kiye hue

baaham-digar hue hain dil o deeda phir raqueeb

nazzaara o khayaal ka saaman kiye hue

dil phir tawaaf-e-koo-e-malaamat ko jaae hai

pindaar ka sanam-kada weeran kiye hue

phir shauque kar raha hai khareedaar ki talab

arz-e-mata-e-aql-o-dil-o-jan kiye hue

daude hai phir har ek gul-o-laala par khayaal

sad-gulistan nigaah ka saaman kiye hue

phir chaahta hoon naama-e-dildaar kholna

jan nazr-e-dil-farebi-e-unwan kiye hue

maange hai phir kisi ko lab-e-baam par hawas

zulf-e-siyaah rukh pe pareshan kiye hue

chaahe hai phir kisi ko muquabil mein aarzoo

surme se tez dashna-e-mizgan kiye hue

ik nau-bahaar-e-naaz ko taake hai phir nigaah

chehra farogh-e-mai se gulistan kiye hue

phir ji mein hai ki dar pe kisi ke pade rahein

sar zer-baar-e-minnat-e-darban kiye hue

ji dhoondata hai phir wahi fursat ki raat din

baithe rahein tasawwur-e-jaanan kiye hue

ghaalib hamein na chhed ki phir josh-e-ashk se

baithe hain ham tahayya-e-toofan kiye hue