wo apni khoo na chhodenge ham apni waza kyoon chhodein

subuk-sar ban ke kya poochhein ki ham se sargiran kyoon ho

kiya gham-khwaar ne ruswa lage aag is mohabbat ko

na laawe taab jo gham ki wo mera raaz-dan kyoon ho

wafa kaisi kahan ka ishq jab sar phodna thahra

toh phir ai sang-dil tera hi sang-e-aastan kyoon ho

quafas mein mujh se roodaad-e-chaman kahte na dar hamdam

giri hai jis pe kal bijli wo mera aashiyan kyoon ho

ye kah sakte ho ham dil mein nahi hain par ye batlaao

ki jab dil mein tumhin tum ho toh aankhon se nihan kyoon ho

ghalat hai jazb-e-dil ka shikwa dekho jurm kis ka hai

na kheencho gar tum apne ko kashaakash darmiyan kyoon ho

ye fitna aadmi ki khana-weeraani ko kya kam hai

hue tum dost jis ke dushman us ka aasman kyoon ho

yahi hai aazmaana toh sataana kis ko kahte hain

adoo ke ho liye jab tum toh mera imtihan kyoon ho

kaha tum ne ki kyoon ho ghair ke milne mein ruswaai

baja kahte ho sach kahte ho phir kahiyo ki han kyoon ho

nikaala chaahta hai kaam kya taanon se tu ghaalib

tire be-mehar kahne se wo tujh par meharban kyoon ho