ishq se tabeeat ne zeest ka mazaa paaya

dard ki dawa paai dard-e-be-dawa paaya

dost-daar-e-dushman hai etimaad-e-dil maaloom

aah be-asar dekhi naala naa-rasa paaya

saadgi o purkaari be-khudi o hushyaari

husn ko taghaaful mein juraat-aazma paaya

ghuncha phir laga khilne aaj ham ne apna dil

khoon kiya hua dekha gum kiya hua paaya

haal-e-dil nahi maaloom lekin is quadar yaani

ham ne baar-ha dhoonda tum ne baar-ha paaya

shor-e-pand-e-naaseh ne zakhm par namak chhidka

aap se koi poochhe tum ne kya mazaa paaya

hai kahan tamannaa ka doosra quadam yaa rab

ham ne dasht-e-imkan ko ek naqsh-e-pa paaya

be-dimaagh-e-khajlat hoon rashk-e-imtihan ta-kai

ek beksi tujh ko aalam-aashna paaya

khaak-baazi-e-ummeed kaar-khana-e-tifli

yaas ko do-aalam se lab-b-khanda wa paaya

kyoon na wahshat-e-ghaalib baaz-khwaah-e-taskin ho

kushta-e-taghaaful ko khasm-e-khoon-baha paaya

fikr-e-naala mein goya halqua hoon ze-sar-ta-pa

uzw uzw joon zanjeer yak-dil-e-sada paaya

shab nazaara-parwar tha khawaab mein khayaal us ka

subh mauja-e-gul ko naqsh-e-boriya paaya

jis quadar jigar khoon ho koocha daadan-e-gul hai

zakhm-e-tegh-e-quatil ko turfa dil-kusha paaya

hai makin ki pa-daari naam-e-saahib-e-khana

ham se tere kooche ne naqsh-e-muddaa paaya

ne asad jafa-saail ne sitam junoon-maail

tujh ko jis quadar dhoonda ulfat-aazma paaya