aalam ghubaar-e-wahshat-e-majnoon hai sar-b-sar

kab tak khayaal-e-turra-e-laila kare koi

afsurdagi nahi tarab-insha-e-iltifaat

han dard ban ke dil mein magar ja kare koi

rone se ai nadeem malaamat na kar mujhe

aakhir kabhi toh uqda-e-dil wa kare koi

chaak-e-jigar se jab rah-e-pursish na wa hui

kya faaeda ki jaib ko ruswa kare koi

lakht-e-jigar se hai rag-e-har-khaar shaakh-e-gul

ta chand baagh-baani-e-sahra kare koi

naakaami-e-nigaah hai barque-e-nazaara-soz

tu wo nahi ki tujh ko tamaasha kare koi

har sang o khisht hai sadaf-e-gauhar-e-shikast

nuqusan nahi junoon se jo sauda kare koi

sar bar hui na waada-e-sabr-aazma se umr

fursat kahan ki teri tamannaa kare koi

hai wahshat-e-tabeeat-e-ijaad yaas-khez

ye dard wo nahi ki na paida kare koi

bekaari-e-junoon ko hai sar peetne ka shughl

jab haath toot jaaein toh phir kya kare koi

husn-e-farogh-e-shamma-e-sukhan door hai asad

pahle dil-e-gudaakhta paida kare koi

wahshat kahan ki be-khudi insha kare koi

hasti ko lafz-e-maani-e-anqua kare koi

jo kuchh hai mahaw-e-shokhi-e-abroo-e-yaar hai

aankhon ko rakh ke taaque pe dekha kare koi

arz-e-sarishk par hai faza-e-zamaana tang

sahra kahan ki daawat-e-dariya kare koi

wo shokh apne husn pe maghroor hai asad

dikhla ke us ko aaina toda kare koi