kis munh se shukr keejiye is lutf-e-khaas ka

pursish hai aur pa-e-sukhan darmiyan nahi

ham ko sitam azeez sitamgar ko ham azeez

naa-meharban nahi hai agar meharban nahi

bosa nahi na deejiye dushnaam hi sahi

aakhir zaban toh rakhte ho tum gar dahan nahi

har-chand jan-gudaazi-e-quahar-o-itaab hai

har-chand pusht-e-garmi-e-taab-o-tawan nahi

jan mutrib-e-taraana-e-hal-mim-mazeed hai

lab parda-sanj-e-zamazma-e-al-aman nahi

khanjar se cheer seena agar dil na ho do-neem

dil mein chhuri chubho miza gar khoon-chakan nahi

hai nang-e-seena dil agar aatish-kada na ho

hai aar-e-dil nafas agar aazar-fishan nahi

nuqusan nahi junoon mein bala se ho ghar kharaab

sau gaz zamin ke badle bayaaban giran nahi

kahte ho kya likha hai tiri saranwisht mein

goya jabin pe sajda-e-but ka nishan nahi

paata hoon us se daad kuchh apne kalaam ki

roohul-qudus agarche mira ham-zaban nahi

jan hai baha-e-bosa wale kyoon kahe abhi

ghaalib ko jaanta hai ki wo neem-jan nahi

jis ja ki pa-e-sail-e-bala darmiyan nahi

deewaangan ko wan hawas-e-khaanman nahi

gul ghunchaghi mein gharqua-e-dariya-e-rang hai

ai aaghi fareb-e-tamaasha kahan nahi

kis jurm se hai chashm tujhe hasrat qubool

barg-e-hina magar miza-e-khoon-fishan nahi

har rang-e-gardish aaina ijaad-e-dard hai

ashk-e-sahaab juz b-wida-e-khizan nahi

juz ijz kya karoon b-tamannaa-e-be-khudi

taaqat hareef-e-sakhti-e-khawaab-e-giran nahi

ibrat se poochh dard-e-pareshaani-e-nigaah

ye gard-e-waham juz basar-e-imtihan nahi

barque-e-bajaan-e-hausla aatish-fagan asad

ai dil-fasurda taaqat-e-zabt-e-fughan nahi