tere dil mein gar na tha aashob-e-gham ka hausla

tu ne phir kyoon ki thi meri gham-gusaari haae haae

kyoon miri gham-khwaargi ka tujh ko aaya tha khayaal

dushmani apni thi meri dost-daari haae haae

umr bhar ka tu ne paimaan-e-wafa baandha toh kya

umr ko bhi toh nahi hai paaedaari haae haae

zahar lagti hai mujhe aab-o-hawa-e-zindagi

yaani tujh se thi ise naa-saazgaari haae haae

gul-fishaani-ha-e-naaz-e-jalwa ko kya ho gaya

khaak par hoti hai teri laala-kaari haae haae

sharm-e-ruswaai se ja chhupna naquab-e-khaak mein

khatm hai ulfat ki tujh par parda-daari haae haae

khaak mein naamoos-e-paimaan-e-mohabbat mil gai

uth gai duniyaa se raah-o-rasm-e-yaari haae haae

haath hi tegh-aazma ka kaam se jaata raha

dil pe ik lagne na paaya zakhm-e-kaari haae haae

kis tarah kaate koi shab-ha-e-taar-e-barshigaal

hai nazar khoo-karda-e-akhtar-shumaari haae haae

gosh mahjoor-e-payaam o chashm-e-mahroom-e-jamaal

ek dil tis par ye naa-ummeed-waari haae haae

ishq ne pakda na tha ghaalib abhi wahshat ka rang

rah gaya tha dil mein jo kuchh zauque-e-khwaari haae haae