zof se ai girya kuchh baaqui mire tan mein nahi

rang ho kar ud gaya jo khoon ki daaman mein nahi

ho gae hain jama ajza-e-nigaah-e-aaftaab

zarre us ke ghar ki deewaaron ke rauzan mein nahi

kya kahoon taareeki-e-zindaan-e-gham andher hai

pumba noor-w-subh se kam jis ke rauzan mein nahi

raunaque-e-hasti hai ishq-e-khana weeran saaz se

anjuman be-shama hai gar barque khirman mein nahi

zakhm silwaane se mujh par chaara-jui ka hai taan

ghair samjha hai ki lazzat zakhm-e-sozan mein nahi

bas-ki hain ham ik bahaar-e-naaz ke maare hue

jalwa-e-gul ke siwa gard apne madfan mein nahi

quatra quatra ik hayoola hai nae naasoor ka

khoon bhi zauque-e-dard se faarigh mire tan mein nahi

le gai saaqui ki nakhwat qulzum-aashaami miri

mauj-e-mai ki aaj rag meena ki gardan mein nahi

ho fishaar-e-zof mein kya naa-tawaani ki numood

quad ke jhukne ki bhi gunjaaish mire tan mein nahi

thi watan mein shaan kya ghaalib ki ho ghurbat mein quadr

be-takalluf hoon wo musht-e-khas ki gulkhan mein nahi