aks us be-deed ka toh muttasil padta tha subh

din chadhe kya jaanoon aaeene ki kya soorat hui

lauh-e-seena par miri sau neza-e-khatti lage

khastagi is dil-shikasta ki isi baabat hui

kholte hi aankhein phir yan moondani ham ko padin

deed kya koi kare wo kis quadar mohlat hui

paanw mera kalba-e-ahzan mein ab rahta nahi

rafta rafta us taraf jaane ki mujh ko lat hui

mar gaya aawaara ho kar main toh jaise gard-baad

par jise ye waaquia pahuncha use wahshat hui

shaad o khush-taale koi hoga kisoo ko chaah kar

main toh kulfat mein raha jab se mujhe ulfat hui

dil ka jaana aaj kal taaza hua ho toh kahoon

guzre us bhi saanehe ko ham-nashin muddat hui

shauque-e-dil ham naa-tawaanon ka likha jaata hai kab

ab talak aap hi pahunchane ki agar taaqat hui

kya kaf-e-dast ek maidan tha bayaaban ishq ka

jaan se jab us mein guzre tab hamein raahat hui

yoon toh ham aajiz-tareen-e-khalque-e-aalam hain wale

dekhiyo qudrat khuda ki gar hamein qudrat hui

gosh zad chat-pat hi marna ishq mein apne hua

kis ko is beemaari-e-jan-kaah se fursat hui

be-zaban jo kahte hain mujh ko so chup rah jaaenge

maarke mein hashr ke gar baat ki rukhsat hui

ham na kahte the ki naqsh us ka nahi naqquash sahal

chaand saara lag gaya tab neem-rukh soorat hui

is ghazal par shaam se toh soofiyon ko wajd tha

phir nahi maaloom kuchh majlis ki kya haalat hui

kam kisoo ko meer ki mayyat ki haath aai namaaz

naash par us be-sar-o-pa ki bala kasrat hui