faqueeraana aae sada kar chale
ki myan khush raho ham kar chale
jo tujh bin na jeene ko kahte the ham
so is ahad ko ab wafa kar chale
shifa apni taqudeer hi mein na thi
ki maqdoor tak toh dawa kar chale
pade aise asbaab paayaan-e-kaar
ki naachaar yoon ji jala kar chale
wo kya cheez hai aah jis ke liye
har ik cheez se utha kar chale
koi naa-umeedaana karte nigaah
so tum ham se munh bhi chhupa kar chale
bahut aarzoo thi gali ki tiri
so yan se lahoo mein naha kar chale
dikhaai diye yoon ki be-khud kiya
hamein aap se bhi juda kar chale
jabin sajda karte hi karte gai
haque-e-bandagi ham ada kar chale
parastish ki yan tak ki ai but tujhe
nazar mein sabhon ki khuda kar chale
jhade phool jis rang gulbun se yoon
chaman mein jahan ke ham aa kar chale
na dekha gham-e-dostan shukr hai
hamin daagh apna dikha kar chale
gai umr dar-band-e-fikr-e-ghazal
so is fan ko aisa bada kar chale
kahein kya jo poochhe koi ham se meer
jahan mein tum aae the kya kar chale
Responses
No comments yet. Be the first to respond.
meer us ghazal ko khoob kaha tha zameer ne
par ai zaban daraaz bahut ho chuki khamosh
shash jihat se us mein zaalim boo khoon ki raah hai
tera kocha ham se toh kah kis ki bismil gaah hai
ek nabhne ka nahi mizgan talak bojhal hain sab
kaarwan lakht dil har ashk ke ham raah hai
ham jwaanon ko na chhoda us se sab pakde gae
ye do saala dukhtar raz kis quadar shataah hai
pa barahna khaak sar mein moo pareshan seena chaak
haal mera dekhne aa tere hi dil khwaah hai
us junoon par meer koi bhi phire hai shahar mein
jaada-e sahra se kar saazish jo tujh se raah hai