zindagi mein toh na ik dam khush kiya hans bol kar

aaj kyoon rote hain mere aashna mere liye

kunj-e-uzlat mein misaal-e-aasiya hoon gosha-geer

rizque pahunchaata hai ghar baithe khuda mere liye

tu saraapa ajr ai zaahid main sar-ta-pa gunaah

baagh-e-jannat teri khaatir karbala mere liye

naam raushan kar ke kyoonkar bujh na jaata misl-e-shama

naa-muwaafique thi zamaane ki hawa mere liye

har nafas aaeena-e-dil se ye aati hai sada

khaak tu ho ja toh haasil ho jila mere liye

khaak se hai khaak ko ulfat tadapta hoon anees

karbala ke waaste main karbala mere liye