mujhe de rahe hain tasalliyan wo har ek taaza payaam se

kabhi aa ke manzar-e-aam par kabhi hat ke manzar-e-aam se

kyoon kiya raha jo muquabla khatraat-e-gaam-b-gaam se

sar-e-baam-e-ishq-e-tamaam tak rah-e-shauque-e-neem-tamaam se

na gharaz kisi se na waasta mujhe kaam apne hi kaam se

tire zikr se tiri fikr se tiri yaad se tire naam se

mire saaquiya mire saaquiya tujhe marahba tujhe marahba

tu pilaae ja tu pilaae ja isi chashm-e-jaam-b-jaam se

tiri subh-e-aish hai kya bala tujhe ai falak jo ho hausla

kabhi kar le aa ke muquabla gham-e-hijr-e-yaar ki shaam se

mujhe yoon na khaak mein tu mila main agarche hoon tira naqsh-e-pa

tire jalwe ki hai baqua mire shauque-e-naam-b-naam se

tiri chashm-e-mast ko kya kahoon ki nazar nazar hai fusoon fusoon

ye tamaam hosh ye sab junoon isi ek gardish-e-jaam se

ye kitaab-e-dil ki hain aaytein main bataaoon kya jo hain nisbatein

mire sajda-ha-e-dawaam ko tire naqsh-ha-e-khiraam se

mujhe chahiye wahi saaquiya jo baras chale jo chhalak chale

tire husn-e-sheesha-b-dast se tiri chashm-e-baada-b-jaam se

jo utha hai dard utha kare koi khaak us se gila kare

jise zid ho husn ke zikr se jise chidh ho ishq ke naam se

wahin chashm-e-hoor phadak gai abhi pi na thi ki bahak gai

kabhi yak-b-yak jo chhalak gai kisi rind-e-mast ke jaam se

tu hazaar uzr kare magar hamein rashk hai aur hi kuchh jigar

tiri iztiraab-e-nigaah se tire ehtiyaat-e-kalaam se