tiri khushi se agar gham mein bhi khushi na hui

wo zindagi toh mohabbat ki zindagi na hui

kahan wo shokh mulaaquat khud se bhi na hui

bas ek baar hui aur phir kabhi na hui

wo ham hain ahal-e-mohabbat ki jaan se dil se

bahut bukhaar uthe aankh shabanmi na hui

thahar thahar dil-e-betaab pyar toh kar loon

ab us ke baad mulaaquat phir hui na hui

mire khayaal se bhi aah mujh ko bod raha

hazaar tarah se chaaha baraabri na hui

ham apni rindi-o-taaat pe khaak naaz karein

qubool-e-hazrat-e-sultan hui hui na hui

koi badhe na badhe ham toh jaan dete hain

phir aisi chashm-e-tawajjoh hui hui na hui

tamaam harf-o-hikaayat tamaam deeda-o-dil

is ehtimaam pe bhi sharah-e-aashiqui na hui

fasurda-khaatiri-e-ishq ai maaaz-allaah

khayaal-e-yaar se bhi kuchh shaguftagi na hui

tiri nigaah-e-karam ko bhi aazma dekha

aziyyaton mein na honi thi kuchh kami na hui

kisi ki mast-nigaahi ne haath thaam liya

shareek-e-haal jahan meri be-khudi na hui

saba ye un se hamaara payaam kah dena

gae ho jab se yahan subh o shaam hi na hui

wo kuchh sahi na sahi phir bhi zaahid-e-naadan

bade-badon se mohabbat mein kaafiri na hui

idhar se bhi hai siwa kuchh udhar ki majboori

ki ham ne aah toh ki un se aah bhi na hui

khayaal-e-yaar salaamat tujhe khuda rakkhe

tire baghair kabhi ghar mein raushani na hui

gae the ham bhi jigar jalwa-gaah-e-jaanan mein

wo poochhte hi rahe ham se baat bhi na hui