aa ki tujh bin is tarah ai dost ghabraata hoon main

jaise har shay mein kisi shay ki kami paata hoon main

jis quadar afsaana-e-hasti ko dohraata hoon main

aur bhi be-gaana-e-hasti hua jaata hoon main

jab makaan-o-la-makan sab se guzar jaata hoon main

allaah allaah tujh ko khud apni jagah paata hoon main

teri soorat ka jo aaeena use paata hoon main

apne dil par aap kya kya naaz farmaata hoon main

yak-b-yak ghabra ke jitni door hat aata hoon main

aur bhi us shokh ko nazdeek-tar paata hoon main

meri hasti shauque-e-paiham meri fitrat iztiraab

koi manzil ho magar guzra chala jaata hoon main

haae-ri majbooriyan tark-e-mohabbat ke liye

mujh ko samjhaate hain wo aur un ko samjhaata hoon main

meri himmat dekhna meri tabeeat dekhna

jo sulajh jaati hai gutthi phir se uljhaata hoon main

husn ko kya dushmani hai ishq ko kya bair hai

apne hi quadmon ki khud hi thokrein khaata hoon main

teri mahfil tere jalwe phir taquaza kya zaroor

le utha jaata hoon zaalim le chala jaata hoon main

ta-kuja ye parda-daari-ha-e-ishq-o-laaf-e-husn

han sambhal jaaein do-aalam hosh mein aata hoon main

meri khaatir ab wo takleef-e-tajalli kyoon karein

apni gard-e-shauque mein khud hi chhupa jaata hoon main

dil mujassam sher-o-naghma wo saraapa rang-o-boo

kya fazaaein hain ki jin mein hal hua jaata hoon main

ta-kuja zabt-e-mohabbat ta-kuja dard-e-firaaque

raham kar mujh par ki tera raaz kahlaata hoon main

waah-re shauque-e-shahaadat koo-e-quatil ki taraf

gungunaata raqs karta jhoomta jaata hoon main

yaa wo soorat khud jahaan-e-rang-o-boo mahkoom tha

yaa ye aalam apne saae se daba jaata hoon main

dekhna is ishq ki ye turfa-kaari dekhna

wo jafa karte hain mujh par aur sharmaata hoon main

ek dil hai aur toofaan-e-hawaadis ai jigar

ek sheesha hai ki har patthar se takraata hoon main