imaan-o-kufr aur na duniyaa-o-din rahe

ai ishq-e-shaad-baash ki tanha hamin rahe

aalam jab ek haal pe quaem nahi rahe

kya khaak etibaar-e-nigaah-e-yaquin rahe

meri zaban pe shikwa-e-dard-aafrin rahe

shaayad mire hawaas thikaane nahi rahe

jab tak ilaahi jism mein jaan-e-hazin rahe

nazrein miri jawaan rahein dil hasin rahe

yaa-rab kisi ke raaz-e-mohabbat ki khair ho

dast-e-junoon rahe na rahe aastin rahe

ta-chand josh-e-ishq mein dil ki hifaaztein

meri bala se ab wo junooni kahin rahe

ja aur koi zabt ki duniyaa talaash kar

ai ishq ham toh ab tire quabil nahi rahe

mujh ko nahi qubool do-aalam ki wusaatein

quismat mein koo-e-yaar ki do-gaz zamin rahe

ai ishq-e-naala-kash tiri ghairat ko kya hua

hai hai araque araque wo tan-e-naaznin rahe

dard-o-gham-e-firaak ke ye sakht marahle

hairan hoon main ki phir bhi tum itne hasin rahe

allaah-re chashm-e-yaar ki mojiz-bayaaniyan

har ik ko hai guman ki mukhaatib hamin rahe

zaalim utha tu parda-e-waham-o-gumaan-o-fikr

kya saamne wo marahla-haae-yaquin rahe

zaat-o-sifaat-e-husn ka aalam nazar mein hai

mahdood-e-sajda kya mira zauque-e-jabin rahe

kis dard se kisi ne kaha aaj bazm mein

achchha ye hai wo nang-e-mohabbat yahin rahe

sar-daadgaan-e-ishq-o-mohabbat ki kya kami

quatil ki tegh tez khuda ki zamin rahe

is ishq ki talaafi-e-maafaat dekhna

rone ki hasartein hain jab aansoo nahi rahe