kiya taajjub ki miri rooh-e-rawan tak pahunche
pahle koi mire naghmon ki zaban tak pahunche
jab har ik shorish-e- zabt-e-fughan tak pahunche
phir jaane ye hangaama kahan tak pahunche
aankh tak dil se na aae na zaban tak pahunche
baat jis ki hai usi aafat-e-jan tak pahunche
tu jahan par tha bahut pahle wahin aaj bhi hai
dekh rindaan-e-khush-anfaas kahan tak pahunche
jo zamaane ko bura kahte hain khud hain wo bure
kaash ye baat tire gosh-e-giran tak pahunche
badh ke rindon ne quadam hazrat-e-waaiz ke liye
girte padte jo dar-e-peer-e-mughan tak pahunche
tu mire haal-e-pareshan pe bahut tanz na kar
apne gesoo bhi zara dekh kahan tak pahunche
un ka jo farz hai wo ahal-e-siyaasat jaanein
mera paighaam mohabbat hai jahan tak pahunche
ishq ki chot dikhaane mein kahin aati hai
kuchh ishaare the ki jo lafz-o-bayan tak pahunche
jalwe betaab the jo parda-e-fitrat mein jigar
khud tadap kar miri chashm-e-nigran tak pahunche
Responses
No comments yet. Be the first to respond.
ye ishq nahin aasaan itna hi samajh leeje
ik aag ka dariya hai aur Doob ke jaana hai
un ka jo farz hai vo ahl-e-siyaasat jaanein
mera paighaam mohabbat hai jahaan tak pahunche
ik lafz-e-mohabbat ka adna ye fasaana hai
simTe to dil-e-aashiq phaile to zamaana hai
ham ko miTa sake ye zamaane mein dam nahin
ham se zamaana khud hai zamaane se ham nahin
dil ko sukoon rooh ko aaraam aa gaya
maut aa gayi ki dost ka paighaam aa gaya
tabiyat in dinon begaana-e-gham hoti jaati hai
mere hisse ki goya har khushi kam hoti jaati hai