mujhe dein na ghaiz mein dhamkiyan girein laakh baar ye bijliyan

miri saltanat ye hi aashiyan miri milkiyat ye hi chaar par

jinhein kahiye ishq ki wusaatein jo hain khaas husn ki azmatein

ye usi ke qualb se poochhiye jise fakhr ho gham-e-yaar par

mire ashk-e-khoon ki bahaar hai ki muraqqua-e-gham-e-yaar hai

miri shaairi bhi nisaar hai miri chashm-e-sehar-nigaar par

ajab inquilaab-e-zamaana hai mira mukhtasar sa fasaana hai

yahi ab jo baar hai dosh par yahi sar tha zaanoo-e-yaar par

ye kamaal-e-ishq ki saazishein ye jamaal-e-husn ki naazishein

ye inaaytein ye nawaazishein miri ek musht-e-ghubaar par

miri samt se use ai saba ye payaam-e-aakhir-e-gham suna

abhi dekhna ho toh dekh ja ki khizan hai apni bahaar par

ye fareb-e-jalwa hai sar-b-sar mujhe dar ye hai dil-e-be-khabar

kahin jam na jaae tiri nazar inhin chand naqsh o nigaar par

main raheen-e-dard sahi magar mujhe aur chahiye kya jigar

gham-e-yaar hai mira shefta main farefta gham-e-yaar par