be-karan hota nahi be-intiha hota nahi

quatra jab tak badh ke qulzum-aashna hota nahi

us se badh kar dost koi doosra hota nahi

sab juda ho jaaein lekin gham juda hota nahi

zindagi ik haadsa hai aur kaisa haadsa

maut se bhi khatm jis ka silsila hota nahi

kaun ye naaseh ko samjhaae b-tarz-e-dil-nashin

ishq saadique ho toh gham bhi be-mazaa hota nahi

dard se maamoor hoti ja rahi hai kaaenaat

ik dil-e-insan magar dard-aashna hota nahi

mere arz-e-gham pe wo kahna kisi ka haae haae

shikwa-e-gham shewa-e-ahal-e-wafa hota nahi

us maquam-e-qurb tak ab ishq pahuncha hi jahan

deeda-o-dil ka bhi aksar waasta hota nahi

har quadam ke saath manzil lekin is ka kya ilaaj

ishq hi kam-bakht manzil-aashna hota nahi

allaah allaah ye kamaal aur irtibaat-e-husn-o-ishq

faasle hon laakh dil se dil juda hota nahi

kya quayaamat hai ki is daur-e-taraqqui mein jigar

aadmi se aadmi ka haque ada hota nahi