ye kis ka tasawwur hai ye kis ka fasaana hai

jo ashk hai aankhon mein tasbeeh ka daana hai

dil sang-e-malaamat ka har-chand nishaana hai

dil phir bhi mira dil hai dil hi toh zamaana hai

ham ishq ke maaron ka itna hi fasaana hai

rone ko nahi koi hansane ko zamaana hai

wo aur wafa-dushman maanenge na maana hai

sab dil ki sharaarat hai aankhon ka bahaana hai

shaair hoon main shaair hoon mera hi zamaana hai

fitrat mira aaeena qudrat mira shaana hai

jo un pe guzarti hai kis ne use jaana hai

apni hi museebat hai apna hi fasaana hai

kya husn ne samjha hai kya ishq ne jaana hai

ham khaak-nasheenon ki thokar mein zamaana hai

aaghaaz-e-mohabbat hai aana hai na jaana hai

ashkon ki hukoomat hai aahon ka zamaana hai

aankhon mein nami si hai chup chup se wo baithe hain

naazuk si nigaahon mein naazuk sa fasaana hai

ham dard-b-dil naalan wo dast-b-dil hairan

ai ishq toh kya zaalim tera hi zamaana hai

yaa wo the khafa ham se yaa ham hain khafa un se

kal un ka zamaana tha aaj apna zamaana hai

ai ishq-e-junoon-pesha han ishq-e-junoon-pesha

aaj ek sitamgar ko hans hans ke rulaana hai

thodi si ijaazat bhi ai bazm-gah-e-hasti

aa nikle hain dam-bhar ko rona hai rulaana hai

ye ishq nahi aasan itna hi samajh leeje

ik aag ka dariya hai aur doob ke jaana hai

khud husn-o-shabaab un ka kya kam hai raqueeb apna

jab dekhiye ab wo hain aaeena hai shaana hai

tasweer ke do rukh hain jan aur gham-e-jaanan

ik naqsh chhupaana hai ik naqsh dikhaana hai

ye husn-o-jamaal un ka ye ishq-o-shabaab apna

jeene ki tamannaa hai marne ka zamaana hai

mujh ko isi dhun mein hai har lahza basar karna

ab aae wo ab aae laazim unhein aana hai

khuddaari-o-mahroomi mahroomi-o-khuddaari

ab dil ko khuda rakkhe ab dil ka zamaana hai

ashkon ke tabassum mein aahon ke tarannum mein

masoom mohabbat ka masoom fasaana hai

aansoo toh bahut se hain aankhon mein jigar lekin

bandh jaae so moti hai rah jaae so daana hai