ab zaban bhi de ada-e-shukr ke quabil mujhe

dard bakhsha hai agar tu ne bajaae-dil mujhe

yoon tadap kar dil ne tadpaaya sar-e-mahfil mujhe

us ko quatil kahne waale kah uthe quatil mujhe

ab kidhar jaaoon bata ai jazba-e-kaamil mujhe

har taraf se aaj aati hai sada-e-dil mujhe

rok sakti ho toh badh kar rok le manzil mujhe

har taraf se aaj aati hai sada-e-dil mujhe

jaan di ki hashr tak main hoon miri tanhaaiyan

han mubaarak fursat-e-nazzaara-e-quatil mujhe

har ishaare par hai phir bhi gardan-e-tasleem kham

jaanta hoon saaf dhoke de raha hai dil mujhe

ja bhi ai naaseh kahan ka sood aur kaisa ziyan

ishq ne samjha diya hai ishq ka haasil mujhe

main azal se subh-e-mahshar tak farozan hi raha

husn samjha tha charaagh-e-kushta-e-mahfil mujhe

khoon-e-dil rag rag mein jam kar rah gaya is waham se

badh ke seene se na lipta le mira quatil mujhe

kaisa quatra kaisa dariya kis ka toofan kis ki mauj

tu jo chaahe toh dubo de khushki-e-saahil mujhe

phoonk de ai ghairat-e-soz-e-mohabbat phoonk de

ab samajhti hain wo nazrein raham ke quabil mujhe

tod kar baitha hoon raah-e-shauque mein pa-e-talab

dekhna hai jazba-e-be-taabi-e-manzil mujhe

ai hujoom-e-naa-umeedi shaad-baash-o-zinda-baash

tu ne sab se kar diya begaana-o-ghaafil mujhe

dard-e-mahroomi sahi ehsaas-e-naakaami sahi

us ne samjha toh bahar-soorat kisi quabil mujhe

ye bhi kya manzar hai badhte hain na rukte hain quadam

tak raha hoon door se manzil ko main manzil mujhe