jo tere aariz o gesoo ke darmiyan guzre

kabhi kabhi wahi lamhe bala-e-jan guzre

mujhe ye waham raha muddaton ki juraat-e-shauque

kahin na khaatir-e-masoom par giran guzre

har ik maquam-e-mohabbat bahut hi dilkash tha

magar ham ahal-e-mohabbat kashan kashan guzre

junoon ke sakht maraahil bhi teri yaad ke saath

hasin hasin nazar aae jawan jawan guzre

miri nazar se tiri justujoo ke sadque mein

ye ik jahan hi nahi sainkadon jahan guzre

hujoom-e-jalwa mein parwaaz-e-shauque kya kahna

ki jaise rooh sitaaron ke darmiyan guzre

khata-muaaf zamaane se bad-guman ho kar

tiri wafa pe bhi kya kya hamein guman guzre

mujhe tha shikwa-e-hijran ki ye hua mahsoos

mire quareeb se ho kar wo naa-gahan guzre

rah-e-wafa mein ik aisa maquam bhi aaya

ki ham khud apni taraf se bhi bad-guman guzre

khuloos jis mein ho shaamil wo daur-e-ishq-o-hawas

na raaegan kabhi guzra na raaegan guzre

usi ko kahte hain jannat usi ko dozakh bhi

wo zindagi jo haseenon ke darmiyan guzre

bahut haseen manaazir bhi husn-e-fitrat ke

na jaane aaj tabeeat pe kyoon giran guzre

wo jin ke saae se bhi bijliyan larazti thin

miri nazar se kuchh aise bhi aashiyan guzre

mira toh farz chaman-bandi-e-jahan hai faquat

miri bala se bahaar aae yaa khizan guzre

kahan ka husn ki khud ishq ko khabar na hui

rah-e-talab mein kuchh aise bhi imtihan guzre

bhari bahaar mein taaraaji-e-chaman mat poochh

khuda kare na phir aankhon se wo saman guzre

koi na dekh saka jin ko wo dilon ke siwa

muaamlaat kuchh aise bhi darmiyan guzre

kabhi kabhi toh isi ek musht-e-khaak ke gird

tawaaf karte hue haft aasman guzre

bahut haseen sahi sohabtein gulon ki magar

wo zindagi hai jo kaanton ke darmiyan guzre

abhi se tujh ko bahut naagwaar hain hamdam

wo haadsaat jo ab tak rawan-dawan guzre

jinhein ki deeda-e-shaair hi dekh sakta hai

wo inquilaab tire saamne kahan guzre

bahut azeez hai mujh ko unhein kya yaad jigar

wo haadsaat-e-mohabbat jo naa-gahan guzre