aankhon mein bas ke mein sama kar chale gae
khwaabeeda thi jaga kar chale gae
husn-e-azal ki shaan dikha kar chale gae
ik waaquia sa yaad dila kar chale gae
chehre tak aasteen wo la kar chale gae
kya raaz tha ki jis ko chhupa kar chale gae
rag rag mein is tarah wo sama kar chale gae
jaise mujhi ko mujh se chura kar chale gae
meri hayaat-e-ishq ko de kar junoon-e-shauque
mujh ko tamaam hosh bana kar chale gae
samjha ke pastiyan mire auj-e-kamaal ki
apni bulandiyan wo dikha kar chale gae
apne farogh-e-husn ki dikhla ke wusaatein
mere hudood-e-shauque badha kar chale gae
har shay ko meri khaatir-e-naashaad ke liye
aaeena-e-jamaal bana kar chale gae
aae the dil ki pyaas bujhaane ke waaste
ik aag si wo aur laga kar chale gae
aae the chashm-e-shauque ki hasrat nikaalne
sar-ta-quadam nigaah bana kar chale gae
ab kaarobaar-e-ishq se fursat mujhe kahan
kaunain ka wo dard badha kar chale gae
shukr-e-karam ke saath ye shikwa bhi ho qubool
apna sa kyoon na mujh ko bana kar chale gae
lab tharathra ke rah gae lekin wo ai jigar
jaate hue nigaah mila kar chale gae
Responses
No comments yet. Be the first to respond.
ye ishq nahin aasaan itna hi samajh leeje
ik aag ka dariya hai aur Doob ke jaana hai
un ka jo farz hai vo ahl-e-siyaasat jaanein
mera paighaam mohabbat hai jahaan tak pahunche
ik lafz-e-mohabbat ka adna ye fasaana hai
simTe to dil-e-aashiq phaile to zamaana hai
ham ko miTa sake ye zamaane mein dam nahin
ham se zamaana khud hai zamaane se ham nahin
dil ko sukoon rooh ko aaraam aa gaya
maut aa gayi ki dost ka paighaam aa gaya
tabiyat in dinon begaana-e-gham hoti jaati hai
mere hisse ki goya har khushi kam hoti jaati hai