shaayad wo din pahla din tha palkein bojhal hone ka

mujh ko dekhte hi jab us ki angadaai sharmaai hai

us din pahli baar hua tha mujh ko rifaaqat ka ehsaas

jab us ke malboos ki khushboo ghar pahunchaane aai hai

husn se arz-e-shauque na karna husn ko zak pahunchaana hai

ham ne arz-e-shauque na kar ke husn ko zak pahunchaai hai

ham ko aur toh kuchh nahi soojha albatta us ke dil mein

soz-e-raquabat paida kar ke us ki neend udaai hai

ham donon mil kar bhi dilon ki tanhaai mein bhatkenge

paagal kuchh toh soch ye tu ne kaisi shakl banaai hai

ishaque-e-pechan ki sandal par jaane kis din bel chadhe

kyaari mein paani thahra hai deewaaron par kaai hai

husn ke jaane kitne chehre husn ke jaane kitne naam

ishq ka pesha husn-parasti ishq bada harjaai hai

aaj bahut din baad main apne kamre tak aa nikla tha

joon hi darwaaza khola hai us ki khushboo aai hai

ek toh itna habs hai phir main saansein roke baitha hoon

weeraani ne jhaadoo de ke ghar mein dhool udaai hai