be-niyaazaana sun liya gham-e-dil

meharbaani hai meharbaani hai

wo bhala meri baat kya maane

us ne apni bhi baat maani hai

shola-e-dil hai ye ki shola-saaz

yaa tira shola-e-jawaani hai

wo kabhi rang wo kabhi khushboo

gaah gul gaah raat-raani hai

ban ke masoom sab ko taad gai

aankh us ki badi siyaani hai

aap-beeti kaho ki jag-beeti

har kahaani miri kahaani hai

donon aalam hain jis ke zer-e-nagin

dil usi gham ki raajdhaani hai

ham toh khush hain tiri jafa par bhi

be-sabab teri sargiraani hai

sar-b-sar ye faraaz-e-mahr-o-quamar

teri uthti hui jawaani hai

aaj bhi sun rahe hain quissa-e-ishq

go kahaani bahut puraani hai

zabt keeje toh dil hai angaara

aur agar roiye toh paani hai

hai thikaana ye dar hi us ka bhi

dil bhi tera hi aastaani hai

un se aise mein jo na ho jaae

nau-jawaani hai nau-jawaani hai

dil mira aur ye gham-e-duniyaa

kya tire gham ki paasbaani hai

gardish-e-chashm-e-saaqui-e-dauran

daur-e-aflaak ki bhi paani hai

ai lab-e-naaz kya hain wo asraar

khaamushi jin ki tarjumaani hai

mai-kadon ke bhi hosh udne lage

kya tiri aankh ki jawaani hai

khud-kushi par hai aaj aamaada

are duniyaa badi diwaani hai

koi izhar-e-naa-khushi bhi nahi

bad-gumaani si bad-gumaani hai

mujh se kahta tha kal farishta-e-ishq

zindagi hijr ki kahaani hai

bahar-e-hasti bhi jis mein kho jaae

boond mein bhi wo be-karaani hai

mil gae khaak mein tire ushshaaque

ye bhi ik amr-e-aasmaani hai

zindagi intizaar hai tera

ham ne ik baat aaj jaani hai

kyoon na ho gham se hi quimaash us ka

husn tasweer-e-shaadmaani hai

sooni duniyaa mein ab toh main hoon aur

maatam-e-ishq-e-aan-jahaani hai

kuchh na poochho firaaque ahad-e-shabaab

raat hai neend hai kahaani hai