khuda-o-aharman badle wo imaan-e-dui badla

hadood-e-khair-o-shar badle mazaaque-e-kaafiri badla

nae insaan ka jab daur-e-khud-naa-aaghi badla

rumooz-e-be-khudi badle taquaza-e-khudi badla

badalte ja rahe hain ham bhi duniyaa ko badalne mein

nahi badli abhi duniyaa toh duniyaa ko abhi badla

nai manzil ke meer-e-kaarwan bhi aur hote hain

puraane khizr-e-rah badle wo tarz-e-rahabri badla

kabhi socha bhi hai ai nazm-e-kohna ke khuda-wando

tumhaara hashr kya hoga jo ye aalam kabhi badla

udhar pichhle se ahal-e-maal-o-zar par raat bhaari hai

idhar bedaari-e-jamhoor ka andaaz bhi badla

zahe soz-e-gham-e-aadam khusha saaz-e-dil-e-aadam

isi ik shama ki lau ne jahaan-e-teergi badla

nae mansoor hain sadiyon puraane shekh-o-quazi hain

na fatwe kufr ke badle na uzr-e-daar hi badla

bataae toh bataae us ko teri shokhi-e-pinhan

tiri chashm-e-tawajjoh hai ki tarz-e-be-rukhi badla

b-faiz-e-aadam-e-khaaki zamin sona ugalti hai

usi zarre ne daur-e-mehar-o-maah-o-mushatri badla

sitaare jaagte hain raat lat chhatkaae soti hai

dabe paanw kisi ne aa ke khawaab-e-zindagi badla

firaaque ham-nawa-e-meer-o-ghaalib ab nae naghme

wo bazm-e-zindagi badli wo rang-e-shaairi badla