maayoosiyon ki god mein dam todta hai ishq

ab bhi koi bana le toh bigdi nahi hai baat

kuchh aur bhi toh ho in ishaaraat ke siwa

ye sab toh ai nigaah-e-karam baat baat baat

ik umr kat gai hai tire intizaar mein

aise bhi hain ki kat na saki jin se ek raat

ham ahal-e-intizaar ke aahat pe kaan the

thandi hawa thi gham tha tira dhal chali thi raat

yoon toh bachi bachi si uthi wo nigaah-e-naaz

duniyaa-e-dil mein ho hi gai koi waardaat

jin ka suraagh pa na saki gham ki rooh bhi

naadan hue hain ishq mein aise bhi saanehaat

har sai o har amal mein mohabbat ka haath hai

taameer-e-zindagi ke samajh kuchh muharrikaat

us ja tiri nigaah mujhe le gai jahan

leti ho jaise saans ye be-jaan kaaenaat

kya neend aae us ko jise jagna na aae

jo din ko din kare wo kare raat ko bhi raat

dariya ke madd-o-jazr bhi paani ke khel hain

hasti hi ke karishme hain kya maut kya hayaat

ahal-e-raza mein shaan-e-baghaawat bhi ho zara

itni bhi zindagi na ho paaband-e-rasmiyaat

ham ahal-e-gham ne rang-e-zamaana badal diya

koshish toh ki sabhi ne magar ban pade ki baat

paida kare zameen nai aasman naya

itna toh le koi asar-e-daur-kaaenaat

shaair hoon gahri neend mein hain jo haqueequtein

chaunka rahe hain un ko bhi mere tawahhumaat

mujh ko toh gham ne fursat-e-gham bhi na di firaaque

de fursat-e-hayaat na jaise gham-e-hayaat