dilon ko tere tabassum ki yaad yoon aai

ki jagamga uthein jis tarah mandiron mein charaagh

jhalakti hai khinchi shamsheer mein nai duniyaa

hayaat o maut ke milte nahi hain aaj dimaagh

hareef-e-seena-e-majrooh o aatish-e-gham-e-ishq

na gul ki chaak-garebaaniyan na laale ke daagh

wo jin ke haal mein lau de uthe gham-e-farda

wahi hain anjuman-e-zindagi ke chashm-o-charaagh

tamaam shola-e-gul hai tamaam mauj-e-bahaar

ki ta-had-e-nigah-e-shauque lahalhaate hain baagh

nai zameen naya aasman nai duniyaa

suna toh hai ki mohabbat ko in dinon hai faraagh

jo tohamtein na uthin ik jahan se un ke samet

gunaahgaar-e-mohabbat nikal gae be-daagh

jo chhup ke taaron ki aankhon se paanw dharta hai

usi ke naqsh-e-kaf-e-pa se jal uthe hain charaagh

jahaan-e-raaz hui ja rahi hai aankh tiri

kuchh is tarah wo dilon ka laga rahi hai suraagh

zamaana kood pada aag mein yahi kah kar

ki khoon chaat ke ho jaaegi ye aag bhi baagh

nigaahein matla-e-nau par hain ek aalam ki

ki mil raha hai kisi phootti kiran ka suraagh

dilon mein daagh-e-mohabbat ka ab ye aalam hai

ki jaise neend mein doobe hon pichhli raat charaagh

firaaque bazm-e-charaaghan hai mahfil-e-rindan

saje hain pighli hui aag se chhalakte ayaagh