wo chup-chaap aansoo bahaane ki raatein
wo ik shakhs ke aane ki raatein
-e-mah ki wo thandi aanchein wo shabnam
tire husn ke rasmasaane ki raatein
jawaani ki dosheezgi ka tabassum
gul-e-zaar ke wo khilaane ki raatein
phuwaarein si naghmon ki padti hon jaise
kuchh us lab ke sunne-sunaane ki raatein
mujhe yaad hai teri har subh-e-rukhsat
mujhe yaad hain tere aane ki raatein
pur-asraar si meri arz-e-tamannaa
wo kuchh zer-e-lab muskuraane ki raatein
sar-e-shaam se ratajga ke wo saaman
wo pichhle pahar neend aane ki raatein
sar-e-shaam se ta-sahar qurb-e-jaanan
na jaane wo thin kis zamaane ki raatein
sar-e-mai-kada tishnagi ki wo quasmein
wo saaqui se baatein banaane ki raatein
ham-aaghoshiyan shaahid-e-meharban ki
zamaane ke gham bhool jaane ki raatein
firaaque apni quismat mein shaayad nahi the
thikaane ke din yaa thikaane ki raatein
Responses
No comments yet. Be the first to respond.