nashsha-e-sad-jaam kaif-e-intizaar-e-yaar tha

hijr mein thahra hua dil saaghar-e-sarshaar tha

alwidaaa ai bazm-e-anjum hijr ki shab al-firaaque

ta-ba-e-daur-e-zindagaani intizaar-e-yaar tha

ek ada se be-niyaaz-e-qurb-o-doori kar diya

maawra-e-wasl-o-hijran husn ka iquraar tha

jauhar-e-aaeena-e-aalam bane aansoo mire

yoon toh sach ye hai ki rona ishq mein bekaar tha

shokhi-e-raftaar wajh-e-hasti-e-barbaad thi

zindagi kya thi ghubaar-e-rahguzaar-e-yaar tha

ulfat-e-dereena ka jab zikr ishaaron mein kiya

muskura kar mujh se poochha tum ko kis se pyar tha

dil-dukhe roe hain shaayad is jagah ai koo-e-dost

khaak ka itna chamak jaana zara dushwaar tha

zarra zarra aaina tha khud-numaai ka firaaque

sar-b-sar sahra-e-aalam jalwa-zaar-e-yaar tha