kisi badmast ko raaz-aashna sab ka samajhte hain

nigaah-e-yaar tujh ko kya bataaein kya samajhte hain

bas itne par hamein sab log deewaana samajhte hain

ki is duniyaa ko ham ik doosri duniyaa samajhte hain

kahan ka wasl tanhaai ne shaayad bhes badla hai

tire dam bhar ke mil jaane ko ham bhi kya samajhte hain

umeedon mein bhi un ki ek shaan-e-be-niyaazi hai

har aasaani ko jo dushwaar ho jaana samajhte hain

yahi zid hai toh khair aankhein uthaate hain ham us jaanib

magar ai dil ham is mein jaan ka khatka samajhte hain

kahin hon tere deewaane thahar jaaein toh zindan hai

jidhar ko munh utha kar chal pade sahra samajhte hain

jahan ki phitrat-e-begaana mein jo kaif-e-gham bhar dein

wahi jeena samajhte hain wahi marna samajhte hain

hamaara zikr kya ham ko toh hosh aaya mohabbat mein

magar ham quais ka deewaana ho jaana samajhte hain

na shokhi shokh hai itni na purkaar itni purkaari

na jaane log teri saadgi ko kya samajhte hain

bhula din ek muddat ki jafaaein us ne ye kah kar

tujhe apna samajhte the tujhe apna samajhte hain

ye kah kar aabla-pa raundate jaate hain kaanton ko

jise talwon mein kar lein jazb use sahra samajhte hain

ye hasti neesti sab mauj-khezi hai mohabbat ki

na ham quatra samajhte hain na ham dariya samajhte hain

firaaque is gardish-e-ayyaam se kab kaam nikla hai

sahar hone ko bhi ham raat kat jaana samajhte hain