ye sukoot-e-naaz ye dil ki ragon ka tootna

khaamushi mein kuchh shikast-e-saaz ki baatein karo

nikhat-e-zulf-e-pareshan daastaan-e-shaam-e-gham

subh hone tak isi andaaz ki baatein karo

har rag-e-dil wajd mein aati rahe dukhti rahe

yoonhi us ke ja-o-beja naaz ki baatein karo

jau adam ki jaan hai jo hai payaam-e-zindagi

us sukoot-e-raaz us aawaaz ki baatein karo

ishq ruswa ho chala be-kaif sa bezaar sa

aaj us ki nargis-e-ghammaaz ki baatein karo

naam bhi lena hai jis ka ik jahaan-e-rang-o-boo

dosto us nau-bahaar-e-naaz ki baatein karo

kis liye uzr-e-taghaaphul kis liye ilzaam-e-ishq

aaj charkh-e-tafarqua-parwaaz ki baatein karo

kuchh quafas ki teeliyon se chhan raha hai noor sa

kuchh faza kuchh hasrat-e-parwaaz ki baatein karo

jo hayaat-e-jaawidan hai jo hai marg-e-naa-gahan

aaj kuchh us naaz us andaaz ki baatein karo

ishq-e-be-parwa bhi ab kuchh naa-shakeba ho chala

shokhi-e-husn-e-karishma-saaz ki baatein karo

jis ki furqat ne palat di ishq ki kaaya firaaque

aaj us isa-nafas dam-saaz ki baatein karo