dil ki ginti na yagaanon mein na begaanon mein

lekin us jalwa-gah-e-naaz se uthta bhi nahi

meharbaani ko mohabbat nahi kahte ai dost

aah ab mujh se tiri ranjish-e-beja bhi nahi

ek muddat se tiri yaad bhi aai na hamein

aur ham bhool gae hon tujhe aisa bhi nahi

aaj ghaflat bhi un aankhon mein hai pahle se siwa

aaj hi khaatir-e-beemaar shakeba bhi nahi

baat ye hai ki sukoon-e-dil-e-wahshi ka maquam

kunj-e-zindan bhi nahi wusaat-e-sahra bhi nahi

are sayyaad hamin gul hain hamin bulbul hain

tu ne kuchh aah suna bhi nahi dekha bhi nahi

aah ye majma-e-ahbaab ye bazm-e-khaamosh

aaj mahfil mein firaaque-e-sukhan-aara bhi nahi

ye bhi sach hai ki mohabbat pe nahi main majboor

ye bhi sach hai ki tira husn kuchh aisa bhi nahi

yoon toh hangaame uthaate nahi deewaana-e-ishq

magar ai dost kuchh aison ka thikaana bhi nahi

fitrat-e-husn toh maaloom hai tujh ko hamdam

chaara hi kya hai b-juz sabr so hota bhi nahi

munh se ham apne bura toh nahi kahte ki firaaque

hai tira dost magar aadmi achchha bhi nahi