ye mod wo hai ki parchhaaiyan bhi dengi na saath

musaafiron se kaho us ki rahguzar aai

faza tabassum-e-subh-e-bahaar thi lekin

pahunch ke manzil-e-jaanan pe aankh bhar aai

kahin zamaan-o-makan mein hai naam ko bhi sukoon

magar ye baat mohabbat ki baat par aai

kisi ki bazm-e-tarab mein hayaat batti thi

umeed-waaron mein kal maut bhi nazar aai

kahan har ek se insaaniyat ka baar utha

ki ye bala bhi tire aashiquon ke sar aai

dilon mein aaj tiri yaad muddaton ke baad

b-chehra-e-mutbassim b-chashm-e-tar aai

naya nahi hai mujhe marg-e-naa-gahan ka payaam

hazaar rang se apni mujhe khabar aai

faza ko jaise koi raag cheerta jaae

tiri nigaah dilon mein yoonhi utar aai

zara wisaal ke baad aaina toh dekh ai dost

tire jamaal ki dosheezgi nikhar aai

tira hi aks sarishk-e-gham-e-zamaana mein tha

nigaah mein tiri tasweer si utar aai

ajab nahi ki chaman-dar-chaman bane har phool

kali kali ki saba ja ke god bhar aai

shab-e-firaaque uthe dil mein aur bhi kuchh dard

kahoon ye kaise tiri yaad raat-bhar aai