nigah-e-naaz mein ye pichhle pahar rang-e-khumaar

neend mein doobi hui chandr-kiran kya kahna

baagh-e-jannat pe ghata jaise baras ke khul jaae

ye suhaani tiri khushboo-e-badan kya kahna

thahri thahri si nigaahon mein ye wahshat ki kiran

chaunke chaunke se ye aahoo-e-khutan kya kahna

roop sangeet ne dhaara hai badan ka ye rachaaw

tujh pe lahloot hai be-saakhta-pan kya kahna

jaise lahraae koi shola-kamar ki ye lachak

sar-b-sar aatish-e-sayyaal badan kya kahna

jis tarah jalwa-e-firdos hawaaon se chhine

pairhan mein tire rangeeni-e-tan kya kahna

jalwa-o-parde ka ye rang dam-e-nazzaara

jis tarah adh-khule ghunghat mein dulhan kya kahna

dam-e-taqureer khil uthte hain gulistan kya kya

yoon toh ik ghuncha-e-nauras hai dahan kya kahna

dil ke aaeene mein is tarah utarti hai nigaah

jaise paani mein lachak jaae kiran kya kahna

lahalhaata hua ye quad ye lahakta joban

zulf so mahki hui raaton ka ban kya kahna

tu mohabbat ka sitaara toh jawaani ka suhaag

husn lau deta hai laal-e-yaman kya kahna

teri aawaaz savera tiri baatein tadka

aankhein khul jaati hain ejaaz-e-sukhan kya kahna

zulf-e-shab-goon ki chamak paikar-e-seemin ki damak

deep-maala hai sar-e-gang-o-jaman kya kahna

neelgoon shabanmi kapdon mein badan ki ye jot

jaise chhanti ho sitaaron ki kiran kya kahna