ek paighaam-e-zindagaani bhi

aashiqui marg-e-naa-gahaani bhi

is ada ka tiri jawaab nahi

meharbaani bhi sargiraani bhi

dil ko apne bhi gham the duniyaa mein

kuchh balaaein thin aasmaani bhi

mansab-e-dil khushi lutaana hai

gham-e-pinhan ki paasbaani bhi

dil ko sholon se karti hai sairaab

zindagi aag bhi hai paani bhi

shaad-kaamon ko ye nahi taufeeque

dil-e-gham-gin ki shaadmaani bhi

laakh husn-e-yaquin se badh kar hai

un nigaahon ki bad-gumaani bhi

tangana-e-dil-e-malool mein hai

bahar-e-hasti ki be-karaani bhi

ishq-e-naakaam ki hai parchhaain

shaadmaani bhi kaamraani bhi

dekh dil ke nigaar-khaane mein

zakhm-e-pinhan ki hai nishaani bhi

khalque kya kya mujhe nahi kahti

kuchh sunoon main tiri zabaani bhi

aae taareekh-e-ishq mein sau baar

maut ke daur-e-darmiyaani bhi

apni maasoomiyat ke parde mein

ho gai wo nazar siyaani bhi

din ko sooraj-mukhi hai wo nau-gul

raat ko hai wo raat-raani bhi

dil-e-bad-naam tere baare mein

log kahte hain ik kahaani bhi

waza karte koi nai duniyaa

ki ye duniyaa hui puraani bhi

dil ko aadaab-e-bandagi bhi na aae

kar gae log hukmaraani bhi

jaur-e-kam-kam ka shukriya bas hai

aap ki itni meharbaani bhi

dil mein ik hook bhi uthi ai dost

yaad aai tiri jawaani bhi

sar se pa tak supurdagi ki ada

ek andaaz-e-turkamaani bhi

paas rahna kisi ka raat ki raat

mehmaani bhi mezbaani bhi

ho na aks-e-jabeen-e-naaz ki hai

dil mein ik noor-e-kahakshaani bhi

zindagi ain deed-e-yaar firaaque

zindagi hijr ki kahaani bhi