jahan mein thi bas ik afwaah tere jalwon ki

charaagh-e-dair-o-haram jhilmilaae hain kya kya

do-chaar barque-e-tajalli se rahne waalon ne

fareb narm-nigaahi ke khaae hain kya kya

dilon pe karte hue aaj aati jaati chot

tiri nigaah ne pahloo bachaae hain kya kya

nisaar nargis-e-mai-goon ki aaj paimaane

labon tak aae hue tharathraae hain kya kya

wo ik zara si jhalak barque-e-kam-nigaahi ki

jigar ke zakhm-e-nihan muskuraae hain kya kya

charaagh-e-toor jale aaina-dar-aaeena

hijaab barque-e-ada ne uthaae hain kya kya

b-quadr-e-zauque-e-nazar deed-e-husn kya ho magar

nigaah-e-shauque mein jalwe samaae hain kya kya

kahin charaagh kahin gul kahin dil-e-barbaad

khiraam-e-naaz ne fitne uthaae hain kya kya

taghaaful aur badha us ghazaal-e-raana ka

fusoon-e-gham ne bhi jaadoo jagaae hain kya kya

hazaar fitna-e-bedaar khawaab-e-rangin mein

chaman mein ghuncha-e-gul-rang laae hain kya kya

tire khuloos-e-nihan ka toh aah kya kahna

sulook uchatte bhi dil mein samaae hain kya kya

nazar bacha ke tire ishwa-ha-e-pinhan ne

dilon mein dard-e-mohabbat uthaae hain kya kya

payaam-e-husn payaam-e-junoon payaam-e-fanaa

tiri nigah ne fasaane sunaae hain kya kya

tamaam husn ke jalwe tamaam mahroomi

bharam nigaah ne apne ganwaae hain kya kya

firaaque raah-e-wafa mein subuk-rawi teri

bade-badon ke quadam dagamgaae hain kya kya