shaam bhi thi dhuan dhuan husn bhi tha udaas udaas

dil ko kai kahaaniyan yaad si aa ke rah gain

mujh ko kharaab kar gain neem-nigaahiyan tiri

mujh se hayaat o maut bhi aankhein chura ke rah gain

husn-e-nazar-fareb mein kis ko kalaam tha magar

teri adaaein aaj toh dil mein sama ke rah gain

tab kahin kuchh pata chala sidque-o-khuloos-e-husn ka

jab wo nigaahein ishq se baatein bana ke rah gain

tere khiraam-e-naaz se aaj wahan chaman khile

faslein bahaar ki jahan khaak uda ke rah gain

poochh na un nigaahon ki turfa karishma-saaziyan

fitne sula ke rah gain fitne jaga ke rah gain

taaron ki aankh bhi bhar aai meri sada-e-dard par

un ki nigaahein bhi tira naam bata ke rah gain

uf ye zamin ki gardishein aah ye gham ki thokrein

ye bhi toh bakht-e-khufta ke shaane hila ke rah gain

aur toh ahal-e-dard kaun sambhaalta bhala

han teri shaadmaaniyan un ko rula ke rah gain

yaad kuchh aain is tarah bhooli hui kahaaniyan

khoe hue dilon mein aaj dard utha ke rah gain

saaz-e-nashaat-e-zindagi aaj laraz laraz utha

kis ki nigaahein ishq ka dard suna ke rah gain

tum nahi aae aur raat rah gai raah dekhti

taaron ki mahfilein bhi aaj aankhein bichha ke rah gain

jhoom ke phir chalin hawaaein wajd mein aain phir fazaaein

phir tiri yaad ki ghataaein seenon pe chha ke rah gain

qualb o nigaah ki ye id uf ye maaal-e-qurb-o-deed

charkh ki gardishein tujhe mujh se chhupa ke rah gain

phir hain wahi udaasiyan phir wahi sooni kaaenaat

ahal-e-tarab ki mahfilein rang jama ke rah gain

kaun sukoon de saka gham-zadgaan-e-ishq ko

bheegti raatein bhi firaaque aag laga ke rah gain