aatish-e-ishq bhadakti hai hawa se pahle

hont julte hain mohabbat mein dua se pahle

fitne barpa hue har ghuncha-e-sar-basta se

khul gaya raaz-e-chaman chaak-e-quaba se pahle

chaal hai baada-e-hasti ka chhalakta hua jaam

ham kahan the tire naqsh-e-kaf-e-pa se pahle

ab kami kya hai tire be-sar-o-saamaanon ko

kuchh na tha teri quasam tark-e-wafa se pahle

ishq-e-bebaak ko daawe the bahut khalwat mein

kho diya saara bharam sharm-o-haya se pahle

khud-bakhud chaak hue pairhan-e-laala-o-gul

chal gai kaun hawa baad-e-saba se pahle

ham-safar raah-e-adam mein na ho taaron-bhari raat

ham pahunch jaaenge is aabla-pa se pahle

parda-e-sharm mein sad-barque-e-tabassum ke nisaar

hosh jaate rahe nairang-e-haya se pahle

maut ke naam se darte the ham ai shauque-e-hayaat

tu ne toh maar hi daala tha quaza se pahle

be-takalluf bhi tira husn-e-khud-aara tha kabhi

ik ada aur bhi thi husn-e-ada se pahle

ghafaltein hasti-e-faani ki bata dengi tujhe

jo mira haal tha ehsaas-e-fanaa se pahle

ham unhein pa ke firaaque aur bhi kuchh khoe gae

ye takalluf toh na the ahad-e-wafa se pahle