rooh larzan aankh mahaw-e-deed dil naakaam tha

ishq ka aaghaaz bhi shaaista-e-anjaam tha

rafta rafta ishq ko tasweer-e-gham kar hi diya

husn bhi kitna kharaab-e-gardish-e-ayyaam tha

gham-kade mein dahar ke yoon toh andhera tha magar

ishq ka daagh-e-siyah-bakhti charaagh-e-shaam tha

teri duzdeeda-nigaahi yoon toh naa-mahsoos thi

han magar daftar ka daftar husn ka paighaam tha

shaaque ahal-e-shauque par thin us ki ismat-daariyan

sach hai lekin husn dar-parda bahut bad-naam tha

mahaw the gulzaar-e-ranga-rang ke naqsh-o-nigaar

wahashtein thi dil ke sannaate the dasht-e-shaam tha

be-khata tha husn har jaur-o-jafa ke baad bhi

ishq ke sar ta-abad ilzaam hi ilzaam tha

yoon gareban-chaak duniyaa mein nahi hota koi

har khula gulshan shaheed-e-gardish-e-ayyaam tha

dekh husn-e-sharmagin dar-parda kya laaya hai rang

ishq ruswa-e-jahan badnaam hi badnaam tha

raunaque-e-bazm-e-jahan tha go dil-e-gham-gin firaaque

sard tha afsurda tha mahroom tha naakaam tha