har fareb-e-gham-e-duniyaa se khabar-daar toh hai

tera deewaana kisi kaam mein hushyaar toh hai

dekh lete hain sabhi kuchh tire mushtaaque-e-jamaal

khair deedaar na ho hasrat-e-deedaar toh hai

maaarke sar hon usi barque-e-nazar se ai husn

ye chamakti hui chalti hui talwaar toh hai

sar patakne ko patakta hai magar ruk ruk kar

tere wahshi ko khayaal-e-dar-o-deewar toh hai

ishq ka shikwa-e-beja bhi na be-kaar gaya

na sahi jaur magar jaur ka iquraar toh hai

tujh se himmat toh padi ishq ko kuchh kahne ki

khair shikwa na sahi shukr ka izhar toh hai

is mein bhi raabta-e-khaas ki milti hai jhalak

khair iquraar-e-mohabbat na ho inkaar toh hai

kyoon jhapak jaati hai rah rah ke tiri barque-e-nigaah

ye jhijak kis liye ik kushta-e-deedaar toh hai

kai unwaan hain mamnoon-e-karam karne ke

ishq mein kuchh na sahi zindagi be-kaar toh hai

sahar-o-shaam sar-e-anjuman-e-naaz na ho

jalwa-e-husn toh hai ishq-e-siyahkaar toh hai

chaunk uthte hain firaaque aate hi us shokh ka naam

kuchh saraaseemgi-e-ishq ka iquraar toh hai