rafta rafta ghair apni hi nazar mein ho gae

waah-ri ghaflat tujhe apna samajh baithe the ham

hosh ki taufeeque bhi kab ahal-e-dil ko ho saki

ishq mein apne ko deewaana samajh baithe the ham

parda-e-aazurdagi mein thi wo jaan-e-iltifaat

jis ada ko ranjish-e-beja samajh baithe the ham

kya kahein ulfat mein raaz-e-be-hisi kyoonkar khula

har nazar ko teri dard-afza samajh baithe the ham

be-niyaazi ko tiri paaya saraasar soz o dard

tujh ko ik duniyaa se begaana samajh baithe the ham

inqalaab-e-pay-b-pay har gardish o har daur mein

is zameen o aasman ko kya samajh baithe the ham

bhool baithi wo nigaah-e-naaz ahad-e-dosti

us ko bhi apni tabeeat ka samajh baithe the ham

saaf alag ham ko junoon-e-aashiqui ne kar diya

khud ko tere dard ka parda samajh baithe the ham

kaan bajte hain mohabbat ke sukoot-e-naaz ko

daastan ka khatm ho jaana samajh baithe the ham

baaton baaton mein payaam-e-marg bhi aa hi gaya

un nigaahon ko hayaat-afza samajh baithe the ham

ab nahi taab-e-sipaas-e-husn is dil ko jise

be-quaraar-e-shikaw-e-beja samajh baithe the ham

ek duniyaa dard ki tasweer nikli ishq ko

koh-kan aur quais ka quissa samajh baithe the ham

rafta rafta ishq maanoos-e-jahan hota chala

khud ko tere hijr mein tanha samajh baithe the ham

husn ko ik husn hi samjhe nahi aur ai firaaque

meharban naa-meharban kya kya samajh baithe the ham